ພະຍາດຕັບອັກເສບຊະນິດ B ແມ່ນຫຍັງ?
ພະຍາດຕັບອັກເສບຊະນິດ B ແມ່ນຊື່ຂອງເຊື້ອໄວຣັສແລະຊື່ຂອງການເຈັບປ່ວຍທີ່ເຊື້ອໄວຣັສກໍ່ຂຶ້ນ.
ພະຍາດຕັບອັກເສບຊະນິດ B ເຮັດໃຫ້ຕັບຂອງທ່ານເກີດເຈັບປ່ວຍຂຶ້ນມາ. ການດື່ມເຫຼົ້າເກີນຂອບເຂດກໍສາມາດກໍ່ໃຫ້ເກີດອາການນີ້ໄດ້ເຊັ່ນກັນ; ພ້ອມດຽວກັນ ຢາເສບຕິດ, ສານເຄມີບາງປະເພດແລະເຊື້ອໄວຣັສຊະນິດອື່ນກໍສາມາດກໍ່ໃຫ້ເກີດອາການນີ້ໄດ້ເຊັ່ນກັນ.
ຕັບຂອງທ່ານສຳຄັນຫຼາຍຕໍ່ສຸຂະພາບຂອງທ່ານ. ເມື່ອມັນເກີດເສັຍຫາຍຂຶ້ນມາ ມັນອາດຈະບໍ່ສາມາດເຮັດວຽກໄດ້ດີຕາມປົກກະຕິແລະສາມາດເຮັດໃຫ້ທ່ານເຈັບປ່ວຍຢ່າງໜັກໄດ້.
ພະຍາດຕັບອັກເສບຊະນິດ B ບາງເທື່ອກໍເອີ້ນວ່າ ເຮັບບີ “hep B”.
ຂ້ອຍຕິດເຊື້ອຈາກພະຍາດຕັບອັກເສບຊະນິດ B ໄດ້ຢ່າງໃດ?
ພະຍາດຕັບອັກເສບຊະນິດ B ຈະຕິດຕໍ່ກັນເມື່ອເລືອດຫຼືນ້ຳກາມຂອງຄົນໜຶ່ງທີ່ມີເຊື້ອພະຍາດຕັບອັກເສບຊະນິດ B ຜ່ານເຂົ້າໄປໃນເສັ້ນເລືອດຂອງທ່ານ. ທ່ານສາມາດຕິດເຊື້ອຕັບອັກເສບຊະນິດ B ໄດ້ເຖິງແມ່ນວ່າປະລິມານເລືອດຫຼືນ້ຳກາມນັ້ນຈະນ້ອຍຈົນເບິ່ງບໍ່ເຫັນກໍຕາມ.
ສຳລັບເດັກທາຣົກແລະເດັກນ້ອຍ
- ແມ່ທີ່ມີເຊື້ອຕັບອັກເສບຊະນິດ B ສາມາດແພ່ເຊື້ອໃຫ້ລູກນ້ອຍຂອງລາວໄດ້ຕອນເດັກເກີດຖ້າວ່າເດັກທາຣົກບໍ່ໄດ້ຮັບການສັກຢາປ້ອງກັນໂດຍໄວ
- ເດັກນ້ອຍທີ່ມີເຊື້ອຕັບອັກເສບຊະນິດ B ສາມາດແພ່ເຊື້ອໃຫ້ເດັກນ້ອຍຄົນອື່ນທີ່ບໍ່ໄດ້ຮັບການປ້ອງກັນໄດ້, ໂດຍຜ່ານຮອຍບາດຫຼືຮອຍແຜທີ່ບໍ່ໄດ້ປົກປິດໄວ້.
ຜູ້ເຕັມກະສຽນ
ທ່ານສາມາດຕິດເຊື້ອຕັບອັກເສບຊະນິດ B ໄດ້ຈາກ:
- ການຮ່ວມເພດທາງອະໄວຍະວະເພດຍິງ, ທາງກົ້ນ ຫຼື ທາງປາກ ໂດຍບໍ່ໃສ່ຖົງອະນາໄມ.
- ເຂັມສັກຢາ }vflad1kຫຼື ເຄື່ອງມືທີ່ໃຊ້ສັກເຂົ້າໂຕຢ່າງອື່ນລວມທັງການໃຊ້ບ່ວງ ຮ່ວມກັນ
- ສັກລາຍຫຼື ບ່ອງ or ແທງຕາມຮ່າງກາຍດ້ວຍເຄື່ອງມືທີ່ບໍ່ສະອາດ
- ໃຊ້ແປງຖູແຂ້ວ, ມີດແຖ, ຫຼື ໄມ້ຖູເລັບ ຮ່ວມກັນ
- ອຸບັດຕິເຫດທີ່ເກີດຈາກເຂັມຫຼືຖືກເລືອດທີ່ມີເຊື້ອຟົ້ງໃສ່
ທ່ານ ບໍ່ສາມາດ ຕິດເຊື້ອຕັບອັກເສບຊະນິດ B ໄດ້ຈາກ:
- ການກອດ
- ການຈູບ
- ກິນອາຫານຮ່ວມກັນແລະໃຊ້ຖ້ວຍບ່ວງຮ່ວມກັນ
- ກິນອາຫານທີ່ແຕ່ງໂດຍຄົນທີ່ມີເຊື້ອຕັບອັກເສບຊະນິດ B
- ຖືກສັດຫຼືແມງໄມ້ກັດ
- ເຫື່ອ
- ການຊັກເຄື່ອງ
- ການຈາມຫຼືໄອ
- ໃຊ້ຫ້ອງອາບນ້ຳຫຼືສ້ວມຖ່າຍຮ່ວມກັນ
- ສະລອຍນ້ຳ
ຂ້ອຍຈະຮູ້ໄດ້ຢ່າງໃດວ່າຂ້ອຍມີເຊື້ອຕັບອັກເສບຊະນິດ B?
ຄົນສ່ວນຫຼາຍຈະບໍ່ມີສັນຍານຫຼືອອກອາການແລະບໍ່ຮູ້ສຶກເຈັບປ່ວຍຫຍັງ. ວິທີດຽວທີ່ຈະຮູ້ໄດ້ແມ່ນຕ້ອງກວດເລືອດ.
ເມື່ອທ່ານຕິດເຊື້ອຕັບອັກເສບຊະນິດ B ຕອນທຳອິດ ທ່ານອາດຈະມີອາການດັ່ງນີ້:
- ຮາກ
- ໄຂ້ຄີງຮ້ອນ
- ບໍ່ຢາກກິນ
- ນ້ຳຍ່ຽວສີຄ້ຳ
- ເຈັບບໍລິເວນຕັບ (ທາງລຸ່ມແຖວກະດູກຂ້າງດ້ານຂວາ)
- ເຈັບຕາມຂໍ່
- ຕາແລະຜິວເປັນສີເຫຼືອງ (ເປັນຂີ້ໝາກເຫຼືອງ)
ພະຍາດຕັບອັກເສບຊະນິດ B ເຮັດຫຍັງໄດ້ຕໍ່ຮ່າງກາຍຂອງຂ້ອຍ?
ເຊື້ອຕັບອັກເສບຊະນິດ B ຈະເຂົ້າໄປໃນເຊລຂອງຕັບແລະເຮັດໃຫ້ຕັບເກີດເຈັບປ່ວຍຂຶ້ນມາ. ຮ່າງກາຍຕ້ອງເຮັດວຽກໜັກເພື່ອຕໍ່ສູ້ກັບເຊື້ອໄວຣັສທີ່ຢູ່ໃນຕັບນັ້ນ. ການຕໍ່ສູ້ນີ້ຈະທຳລາຍຕັບແລະ, ເມື່ອຫຼາຍປີຜ່ານໄປ, ສາມາດເຮັດໃຫ້ຕັບຢຸດເຮັດວຽກໄດ້.
ຢູ່ໃນກໍລະນີຂອງຜູ້ໃຫຍ່ສ່ວນຫຼາຍ, ຮ່າງກາຍຈະກຳຈັດເຊື້ອຕັບອັກເສບຊະນິດ B ໄດ້ພາຍໃນ 6 ເດືອນຫຼັງຈາກທີ່ຕິດເຊື້ອ, ແລະ ທ່ານຈະບໍ່ສາມາດຕິດເຊື້ອອີກ.
ແຕ່ວ່າໃນກໍລະນີຂອງເດັກນ້ອຍແລະຜູ້ໃຫຍ່ບາງຄົນ, ບາງເທື່ອຮ່າງກາຍກໍສູ້ພະຍາດບໍ່ໄດ້, ແລະເຊື້ອພະຍາດຕັບອັກເສບຊະນິດ B ກໍຈະຢູ່ໃນຮ່າງກາຍຕະຫຼອດຊີວິດ. ອາການນີ້ເອີ້ນວ່າ ‘ຕັບອັກເສບຊະນິດ B ແບບເຮື້ອຮັງ’ ແລະມັນສາມາດທຳລາຍຕັບ, ເຮັດໃຫ້ຕັບເປັນແປ້ວ (ໂຣກຕັບແຂງ) ແລະເປັນມະເຮັງຕັບ. ການໃຊ້ຢາປິ່ນປົວສາມາດຫຼຸດຜ່ອນຄວາມເສັຍຫາຍຂອງຕັບແລະປ້ອງກັນມະເຮັງຕັບໄດ້.
ຂ້ອຍຈະເຮັດຢ່າງໃດຖ້າຂ້ອຍມີເຊື້ອຕັບອັກເສບຊະນິດ B?
ທ່ານ ຕ້ອງ ໄປຫາໝໍທຸກໆຫົກຫາສິບສອງເດືອນ, ເຖິງແມ່ນວ່າທ່ານຈະຮູ້ສຶກສະບາຍດີກໍຕາມ. ທັງນີ້ ກໍຍ້ອນວ່າ ພະຍາດຕັບອັກເສບຊະນິດ B ບໍ່ເຮັດໃຫ້ທ່ານຮູ້ສຶກເຈັບປ່ວຍ. ຖ້າວ່າທ່ານຮູ້ສຶກເຈັບປ່ວຍຂຶ້ນມາ ນັ້ນກໍສະແດງວ່າຕັບຂອງທ່ານໄດ້ຮັບຄວາມເສັຍຫາຍແລ້ວ. .
ພ້ອມດຽວກັບການກວດເລືອດ, ທ່ານໝໍຂອງທ່ານອາດຈະໃຫ້ເຮັດຟາຍໂບຣສະແກນ (Fibroscan®) ດ້ວຍ. ການເຮັດ Fibroscan® ແມ່ນການສະແກນຕັບເຊິ່ງຈະບອກທ່ານໝໍຂອງທ່ານໄດ້ວ່າຕັບໄດ້ຮັບຄວາມເສັຍຫາຍຫຼືຕັບເປັນແປ້ວ (ຕັບແຂງ) ແລ້ວບໍ ແລະ ອາການຮ້າຍແຮງປານໃດ. ຈາກນັ້ນ ທ່ານໝໍຈະເປັນຜູ້ຕັດສິນວ່າທ່ານຕ້ອງກິນຢາ ຫຼື ໄປຄລີນິກປົວຕັບ ຫຼື ໄປພົບແພດຊ່ຽວຊານດ້ານຕັບບໍ.
ພະຍາດຕັບອັກເສບຊະນິດ B ສາມາດປິ່ນປົວຫຼືປົວໃຫ້ຫາຍຂາດໄດ້ບໍ?
ແມ່ນແລ້ວ, ພະຍາດຕັບອັກເສບຊະນິດ B ສາມາດປິ່ນປົວໄດ້.
ແຕ່ວ່າບໍ່ແມ່ນວ່າໝົດທຸກຄົນທີ່ມີເຊື້ອຕັບອັກເສບຊະນິດ B ຈຳເປັນຕ້ອງກິນຢາ. ທ່ານໝໍຂອງທ່ານຈະບອກທ່ານວ່າທ່ານຕ້ອງກິນຢາຫຼືບໍ່.
ຢາບໍ່ສາມາດປິ່ນປົວພະຍາດຕັບອັກເສບຊະນິດ B ໃຫ້ຫາຍຂາດໄດ້. ແຕ່ວ່າມັນສາມາດຄວບຄຸມຄວາມເສັຍຫາຍທີ່ເກີດຂຶ້ນຕໍ່ຕັບຂອງທ່ານ, ເຮັດໃຫ້ເປີເຊັນທີ່ຈະເປັນມະເຮັງຕັບຕ່ຳລົງແລະຊ່ວຍໃຫ້ຕັບຟື້ນຟູປົວແປງໂຕມັນເອງ.
ໃຫ້ລົມກັບທ່ານໝໍຂອງທ່ານວ່າຢາຊະນິດໃດເໝາະສົມກັບທ່ານທີ່ສຸດ.
ຂ້ອຍຈະຊ່ອຍຕັບຂອງຂ້ອຍໄດ້ຢ່າງໃດ?
- ດື່ມເຫຼົ້າໃຫ້ນ້ອຍລົງຫຼືບໍ່ດື່ມເລີຍ
- ກິນອາຫານທີ່ສົມດູນແລະອາຫານສຸຂະພາບ, ແລະຢ່າໃຫ້ມີໄຂມັນຫຼາຍໂພດ
- ຢຸດຫຼືຜ່ອນການສູບຢາລົງ
- ອອກແຮງກາຍຢ່າງສະໝ່ຳສະເໝີ
- ໃຫ້ຄວບຄຸມລະດັບຄວາມກົດດັນທາງອາລົມແລະໃຫ້ໄປຂໍການອູ້ມຊູ
- ໃຫ້ບອກທ່ານໝໍຂອງທ່ານໃຫ້ຊາບຖ້າທ່ານກິນຢາໃດໆເຊັ່ນຢາສະໝຸນໄພ, ຢາວິຕາມິນ, ຫຼືຢາຈີນ. ຢາບາງຢ່າງເຫຼົ່ານີ້ອາດໄປທຳລາຍຕັບໄດ້, ໂດຍສະເພາະຖ້າກິນປະລິມານຫຼາຍແລະກິນເປັນເວລາດົນນານ.
- ໃຫ້ປ້ອງກັນຕົວທ່ານເອງຈາກການຕິດເຊື້ອຕ່າງໆ ເພາະວ່າມັນອາດໄປກະທົບຕໍ່ສຸຂະພາບຂອງທ່ານຢ່າງຮ້າຍແຮງແລະເປັນສາເຫດເຮັດໃຫ້ຕັບຖືກທຳລາຍ:
- ໃຫ້ສັກສາຢາປ້ອງກັນພະຍາດຕັບອັກເສບຊະນິດ A
- ຢ່າໃຊ້ເຂັມຫຼືບ່ວງຮ່ວມກັນໃນການສັກຢາເສບຕິດ
- ໃຫ້ໃຊ້ຖົງອະນາໄມ
ຂ້ອຍຈະຫຼີກເວັ້ນຈາກການຕິດເຊື້ອຕັບອັກເສບຊະນິດ B ຫຼືແພ່ເຊື້ອໃຫ້ຄົນອື່ນໄດ້ຢ່າງໃດ?
ສັກຢາກັນໂຣກ
ການສັກຢາກັນໂຣກແມ່ນວິທີທີ່ດີທີ່ສຸດເພື່ອຢຸດຢັ້ງການແພ່ຜາຍຂອງເຊື້ອໂຣກຕັບອັກເສບຊະນິດ B
ກາຄວາມນສັກຢານັ້ນປອດໄພຫຼາຍແລະມັນຈະປ້ອງກັນທ່ານໄດ້ກວ່າ 95%
ທ່ານຈະໄດ້ສັກ 2 ຫຼື 3 ເຂັມໃນລະຍະເວລາ 6 ເດືອນ, ແລ້ວແຕ່ອາຍຸຂອງທ່ານ.
ໃນປະເທດອອສເຕຣເລັຍ, ເດັກທາຣົກທຸກຄົນທີ່ມີອາຍຸຕ່ຳກວ່າ 1 ປີ ຈະໄດ້ຮັບການສັກຢາຟຣີ 4 ເຂັມພາຍໃນລະຍະ 6 ເດືອນ. ມີການແນະນຳໃຫ້ເດັກນ້ອຍອາຍຸລະຫວ່າງ 10 ຫາ 13 ປີໃຫ້ສັກຢາປ້ອງກັນໂຣກນີ້ ຖ້າບໍ່ໄດ້ສັກຕອນຍັງເປັນເດັກທາຣົກ.
ຖ້າແມ່ມີເຊື້ອຕັບອັກເສບຊະນິດ B ເດັກທາຣົກຈະໄດ້ຮັບການສັກຢາເພີ່ມເຂັມໜຶ່ງພາຍໃນສິບສອງຊົ່ວໂມງຫຼັງຈາກເກີດ. ຢາສັກເຂັມນີ້ຈະເປັນການປ້ອງກັນເດັກທາຣົກໄດ້ດີທີ່ສຸດ. ເມື່ອເດັກທາຣົກອາຍຸໄດ້ 9 ເດືອນ, ເຂົາເຈົ້າຕ້ອງໄດ້ຮັບການກວດເພື່ອໃຫ້ໝັ້ນໃຈວ່າເຂົາເຈົ້າໄດ້ມີພູມຕ້ານທານພະຍາດຕັບອັກເສບຊະນິດ B ແລ້ວ.
ເພື່ອຫຼີກເວັ້ນການແພ່ເຊື້ອຕັບອັກເສບຊະນິດ B ໃຫ້ໃຜຜູ້ໜຶ່ງ:
- ໃຫ້ໝັ້ນໃຈວ່າຜູ້ທີ່ມີຄວາມໃກ້ຊິດກັບທ່ານຕ້ອງໄດ້ສັກຢາປ້ອງກັນ
- ໃຫ້ໃຊ້ຖົງອະນາໄມ
- ຢ່າໃຊ້ ແປງຖູແຂ້ວ, ມີດແຖ ຫຼື ເຄື່ອງໃຊ້ສ່ວນຕົວອື່ນໆທີ່ອາດມີເລືອດຕິດຢູ່, ລວມທັງເລືອດແຫ້ງ ຮ່ວມກັນ
- ຢ່າໃຫ້ຄົນອື່ນແຕະຕ້ອງແຜເປີດຂອງທ່ານນອກຈາກວ່າເຂົາເຈົ້າໃສ່ຖົງມື
- ຢ່າໃຊ້ເຂັມ, ເຂັມສັກຢາ ຫຼື ເຄື່ອງມືສັກຢາເສບຕິດອື່ນໆ ຮ່ວມກັນ
- ຢ່າບໍລິຈາກເລືອດ, ເຊື້ອສະເປີມ, ອະໄວຍະວະ ຫຼື ເນື້ອເຍື່ອຮ່າງກາຍ
ໃຫ້ໂອ້ລົມກັບທ່ານໝໍຂອງທ່ານລ່ວງໜ້າເລື່ອງສັກຢາປ້ອງກັນໃຫ້ລູກນ້ອຍຂອງທ່ານ ຖ້າທ່ານກຳລັງຖືພາ ຫຼື ຢາກມີລູກ.
ຂ້ອຍຕ້ອງບອກໃຫ້ຄົນອື່ນຮູ້ບໍຖ້າຂ້ອຍມີເຊື້ອຕັບອັກເສບຊະນິດ B?
- ທ່ານຄວນບອກຄອບຄົວ, ຄົນທີ່ທ່ານຢູ່ດ້ວຍ ແລະ ຄູ່ຮ່ວມເພດຂອງທ່ານ (ຫຼືບັນດາຄູ່ຮ່ວມເພດ) ໃຫ້ຮູ້ ເພື່ອວ່າເຂົາເຈົ້າຈະໄດ້ໄປກວດແລະສັກຢາປ້ອງກັນ. ທ່ານໝໍຂອງທ່ານສາມາດຊ່ວຍທ່ານໄດ້ໃນເລື່ອງນີ້.
- ຖ້າທ່ານຢາກສະໝັກເຂົ້າຮ່ວມໃນ ກອງທັບແຫ່ງຊາດຂອງອອສເຕຣເລັຍ, ທ່ານຕ້ອງບອກໃຫ້ທາງກອງທັບຊາບ.
- ທ່ານຕ້ອງແຈ້ງໃຫ້ບໍລິສັດປະກັນໄພຂອງທ່ານໃຫ້ຮູ້. ຖ້າບໍ່ແຈ້ງ, ເຂົາເຈົ້າອາດຈະບໍ່ຈ່າຍເງິນໃຫ້ຖ້າທ່ານເຈັບປ່ວຍຫຼືໄດ້ຮັບບາດເຈັບ.
- ຖ້າທ່ານເປັນພະນັກງານດູແລ ສຸຂະພາບ ທີ່ເຮັດວຽກທີ່ກ່ຽວຂ້ອງກັບຂັ້ນຕອນທາງແພດ ເຊິ່ງທ່ານບໍ່ສາມາດແນມເຫັນມືຂອງຕົນເອງໄດ້ (ເຊັ່ນໝໍຜ່າຕັດຫຼືໝໍແຂ້ວ), ທ່ານຕ້ອງແຈ້ງ ນາຍຈ້າງຫຼືຫົວໜ້າຂອງທ່ານໃຫ້ຊາບ ແລະ ຂໍຄຳແນະນຳຈາກທາງແພດຊ່ຽວຊານ.
ທ່ານ ບໍ່ ຈຳເປັນຕ້ອງບອກ ຫົວໜ້າ, ເພື່ອນຮ່ວມງານ, ເພື່ອນນັກຮຽນ ຫຼື ເພື່ອນຝູງ ໃຫ້ ຮູ້ .
ການບອກບຸກຄົນເຊັ່ນໝໍປົວແຂ້ວຫຼືທ່ານໝໍຂອງທ່ານນັ້ນ ຈະຊ່ວຍເຂົາເຈົ້າໃຫ້ການດູແລທາງແພດທີ່ດີທີ່ສຸດໃຫ້ທ່ານ, ແຕ່ວ່າອັນນີ້ກໍແມ່ນການເລືອກຂອງທ່ານເອງ. ຖ້າທ່ານຕັດສິນໃຈບອກໃຫ້ເຂົາເຈົ້າຮູ້, ເຂົາເຈົ້າບໍ່ສາມາດທີ່ຈະໄປບອກຄົນອື່ນຕໍ່.
ທ່ານອາດຢາກເວົ້າລົມກັບຄົນອື່ນໆທີ່ເຂົ້າອົກເຂົ້າໃຈແລະອູ້ມຊູທ່ານໄດ້. ໃຫ້ໃຊ້ເວລາກ່ອນຕັດສິນໃຈວ່າທ່ານຄິດວ່າແມ່ນໃຜແດ່ທີ່ທ່ານເຊື່ອໃຈໄດ້.
ຂ້ອຍຈະໄປຂໍຄວາມຊ່ວຍເຫຼືອແລະຄຳແນະນຳໄດ້ຢູ່ໃສ?
ມີກຸ່ມຊຸມຊົນສຳລັບຜູ້ຕິດພະຍາດຕັບອັກເສບຊະນິດ B ຫຼາຍແຫ່ງໃນອອສເຕຣເລັຍທີ່ສາມາດໃຫ້ຄຳແນະນຳແລະຊ່ວຍເຫຼືອທ່ານໄດ້.
ຂໍການອູ້ມຊູຈາກກຸ່ມຊຸມຊົນພະຍາດຕັບອັກເສບ